الاثنين، 3 نوفمبر 2008

]ديوان صمت الكلام

بسم الله الرحمن الرحيم
صمت الكلام

أشعار سودانية

إيهاب الأمين

إهـــــــــداء

إلى المرأة التي صاغت تشاكيل هذه الحروف
ونثرتها فـيَّ كي أقوم بإشعالها ......
إلى المرأة التي أرهقت صدرها بدخان (الكسرة)
وانتظار زمان يرفض المجئ .......
(بت ود الأنصاري) ابتسامة في زمن الفـجيعة
أمي....
حياة يوسف
إليها أهدي الحب والأمنيات
إليها أهدي حروفها وقصائدها....

إيهــــــــــاب

تــــقـــديـم

منو البقدر يشيل صمتي
ويعبِّـر عنو بالأحرف
ويدوِّنو في شعاع الشمس بالكلمات

كنت أسافر في صوت صديقي المبدع الفنان وليد زاكي الدين وهو يردد (صمت الكلام) بطريقة أنطقت الصمت وحوَّلته إلى فعل يتجلى بحميمية التوق إلى عالم الضوء والسفر عبر الخيال الجموح ؛ وعبرت معه إلى عالم إيهاب الأمين وهو يرسم بريشة الفنان الواعي صورة (للطالعة مني وداخلة في جوف السحابة) لتبتسم الشموس وتصحو صباحات الأمل....
المطر يوم بكرة ينزل
يروي واطاتنا ويبابا
بكرة بتغني العنادل
وتحتفل بي ضي شبابا
وتطل رمزية وسيمة تنسجم مع سهولة المفردات لتكون أغنيات للحبيبة / الوطن...
وكنت قد أسمعني الملحن الأستاذ صلاح إدريس أغنية ذات شفافية عالية وحس إبداعي متدفق ومنحها لحناً يتسق مع مفرداتها ومع صوت الفنان الرقيق الطيب مدثر وقد أعجبتني أيما إعجاب أغنية (أنساها) والتي كتبها الشاعر إيهاب الأمين ولم يضمنها هذه المجموعة الشعرية ويبدو أنه يدخرها لديوان آت.
وفي لوحة أخرى يبدعها شعراً إيهاب الأمين ويوشحها الفنان الجميل شفافية النغم والطرب الحقيقي وقد اتكأ بها وهو (يتكل) زرعه على الرذاذ ويعاتب المحبوبة على عطش زرعه الذي لم يشرب من نبعها الدفاق...
ويتحرك في مدارات أرحب عندما يكتب بإحساس المحبوبة التي طال انتظارها في عمر الزمان وهي تحسب السنوات في حالة أشبه بسريالية الحس المبدع ...
راجياك أنا
يابسمة من عمر الزمان
راجياها وأحسب كم سنة
لتقدمها الفنانة نبوية الملاك كأروع ما يكون الإبداع.
إيهاب الأمين إعلامي وفنان وشاعر يمتلك أدوات الفعل الإبداعي ويندرج ضمن منظومة شعراء السهل الممتنع على الرغم من الرمزية الكثيفة التي تتراءى في قصائده...
بسيمة بتطلع الأسواق
تبيعك بي قرش أسود
تكون داسِّيهو لي يوماً محومر
لسة ما عزفت مزاميرو
وتتلوَّن إشراقات الشاعر إيهاب الأمين بصور زاهية ومفردات مغردة وألوان تحرِّك الساكن في لوحة الشعر الجموح... ويتمتع إيهاب بخيال الفنان الذي يكتشف أوان المطر بوعد الرذاذ ووله النسمات العائدة من البعيد،كالزهر يستشعر قدوم الصباحات الندى لتكون صحبة الورد الفراش، يتكيف مع أجواء القصيدة لتزغرد الكلمات ويندلق العطر على شرفات المساء الساحر في جزيرة الحب والجمال...
أسعدني جداً أن أكون أول متصفح لمجموعة إيهاب الأمين الشعرية الأولى (صمت الكلام)، وسهرت ليلتي أتجوّل في حدائقها الغناء وأطرب بشدو عصافيرها الملوّنة ، وأنا أستعيد عبرها زمن الغناء الرصين،وأرنو من خلالها لزمن قادم وأتفق معه بأن الحياة والأيام حبلى بالجميل الأنيق المدهش ما دام بيننا إيهاب الأمين ومواسم للدفء والعطاء..
أدعوكم لمشاركتي هذا الفرح... والشكر والحب كله للشاعر إيهاب الأمين مع التمنيات.
مدني يوسف النخلي
25فبراير2007

بتمـناك

بتمناك
يا مطراً زارنا
وصحّى موات الأرض البور
بتمناك
والهمس المطوي يدافر
جوة حناجر
شايلة صراخ أطفال مبتور
بتمناك
أنا قلبي النازف
كان بتحدى رحيل الغيم
عن ريداً فيهو النيل
زي أحلى عروس يتراقص
ومن أعماقو يطل النور
أغصان النخلة النايمة
تزور أحضان الجرف الباكي
تعدد في تاريخا الماضي
وعمق الحاضر... وفرحاً جاي
النيل بتباشر بالقمرية
وضل النخلة...
وكلمة عاشق...
بنسج ريدو غنا ودوباي
بتمناك
والقول ممدود أنغام وتحية
بتمناك
بيناتنا سدود...
بيناتنا حدود وسنين ضوئية
دمعة راحل فارق شمسو
وودع آخر نغمة ناي
القمر احتار
في الضلمة الجرفت
مد الحلم اليافع
وحس دلوكة تبشر بالأفراح
القمر النيل...
القمر العرب الرحل
أدى الناس أنوار ساحاتو
وراضي يفجر من واحاتو
وميض البشرى وطعم الكسرة
وحس طنبور
لا شمساً تحزن
لا عصفور يهجر أوكارو
تغني الدنيا ...
تغني النخلة وضل النخلة
وحلم النيل يتخطى السور
بتمناك
يا شغف الوادي...
وشرف أجدادي...
وخالد باقي دهور ودهور
بتمناك
يا مطراً زارنا
وصحى موات الأرض البور

5/3/1996


من ويـن معاك

من وين معاك يبدا الكلام
يا نور رحل...
خلّف مع الحسرات ضلام
يا انتظار خطوة أمل... يا انتصار
يا ليل ممدد
في شوارعنا النشف ريقا
وبكت بعدك سلام



كل النجوم نايحات تشيل
دمعات وجوم رافضات تسيل
ومشى المطر
مشوار دموع
ودع أراضينا اليباب
أنغام رباب...
أنانة ... حزنانة... وتموت
في حلوقا أفراح الوصول
ترحل تفوت
بعدك هجر عشو الوطن
عصفور يدغدغ
عمرو باللوعة الحزن
يا انتحار قمراً طلع
قبال زمن
يوم خاصم السما والغمام



من وين معاك
يا حرقة الأسى والأسف
يبدا الكلام
من وين معاك يبدا الغنا
وتبدا الحروف تحرق تواريخا القدام
الكان مسجلة في الأفق
من وين معاك يبدا القلم
ويكتب رحيل زمن الصدام
يا صرخة القرى والحقول
يا وجعة الموج والفصول
يا همسة الرحلة الأليمة
وقول قديم مزروع شتول
ترحل معاك ضحكة ضفاف
فرحانة بي
موجاً غلب مدو النشاف
من وين معاك
ترجع خطاوي الليل سكون
وتغيّب البهجة الألم والإرتجاف

20/2/1996

عيونك والمطر

لسة بسأل نفسي
عن سر العلاقة البين
عيونك والمطر
ولسة بسأل نفسي
عن سر التضاد
ما بين وجودك والخطر
ولسة بتساءل
شنو الخلى الربيع
ينحاز إليك
وينسج نسايمو غنا
ونغم أجمل وتر
إنت الفتحتي براكي
للغيم ألف باب
وبقيتي أنشودة صحاب
وهتفتي للصبح الأغـر
عصفورة بشويش غردت
فردت جناحا... اتمردت
جات قررت
دون سابق إنذار السفر
وجعتي قلب الليل
وبعزقتي النجوم
رجعتي للموج التساب
صالحتي مابين بوري يا بت
والسحاب
واحرجتي بالضي القمر
وأنا مندهش
ما بين عيونك والمطر
أشتاق ألاقيك سنبلة
يا وردة ... رقصة كمبلا
قدمتي للشوق ألف ناي
وأنا جيت براي
ما كان معاي غير الهواجس
والنوارس ...والكلام
الكان مسافر في الغروب
وجلبتي لي يا بت طيوب
علمتي نجماتي الألق
كرستي لعيوني الأرق
ورسمتي في اللوحة الشفق
شالتني موجات الحنين
فاجأني ضيك حين شرق
مديتي إيدك
وبيك نجيت من الغرق
وهواكي كان نازل مطر
نازف مطر
وأنا لسة بسأل نفسي
عن سر العلاقة
البين عيونك والمطر
12/7/2002

قـولـة أهـلاً

يا غيمات في الدنيا انشرت
يا خطوات الفرح الجافي
يا مجلية بنور العفة
ويا مكسية سماحاً مافي
هلت فوقنا بشائر منك
ختت غنوة ولحناً دافي
كلمة تكون في طول نخلاتك
أهلاً مرحب بيك وعوافي
كلمة بسيطة فريع وسبيطة
محنة وهيطة وبلسم شافي
حتحت شوقك حس قمرية
وشالت شوفك حلمة غافي
يا منسية في كشفة حالك
يا مستورة وحالك خافي
قولة أهلاً ياها المقصد
بقة نورك يوم تنشافي
إنت الزمن الكاسك جابك
دودر بينا فيافي فيافي
وإنت الزمن الكاسك جابك
يكتح رملو سوافي سوافي
يا مطوية في قولة أهلاً
أركزي أثبتي أوعي تخافي
بكرة بمد فرحك ضرعاتو
وبكرة النيل حايرجع وافي
25/11/1997

ربـك لطـف


ربك لطف
لاقاني بيك
في واحدة من أحلى الصدف
رجعني للفرح الزمان
أصلو الفرح طعمو اختلف



ومشيت بعيد
لامن لقيت سري انكشف
وغرامي ليك
الكنت داسيهو انعرف
احترت وين ألقاك... وكيف
في الريدة اتحاشى الكلف
إلا بس ربك لطف
لاقاني بيك
في واحدة من أحلى الصدف



قبال تجيبني الصدفة ليك
أنا كنت ماليني الأسف
وكتين حرق جوفي النويح
وكتين قمر ريدي انكسف
وأنا كنت في حيرة وظنون
ومعاها كم جرحاً نزف
إلا بس ربك لطف
لاقاني بيك
في واحدة من أحلى الصدف
رجعني للفرح الزمان
أصلو الفرح طعمو اختلف

24/9/1999
الـمهـبوشــة
ها مهبوشة
ترازي تزازي في ها دي الفنقة
ها مربوشة
تشري الغيم وتفوتي
تزرعي لينا غنيوة ريدك
شدرة منقة
ما ظنيتك هشتي ودشتي
وشلتي كلامك
بيهو ضربت الكلمة الجاتك
وكت الزنقة
تبدا تقرقر منك ضحكة
تقرقر بطن الواطة
وتمرق شدرة
تخلي الحال الواقف يقعد
خطوة وخطوة
يعود الحنّ وأنّ وغنى
حبيبة قلبو تشيلا الموجة
وعشم العاشق
عشم إبليس الداير الجنة
ها مهبوشة
مكان ما فتنا ووين ما كنا
ما لاقانا ولا صادفنا
دغشاً بحرق زي نار دغشك
سجم الخلا حريقو وفاتك
يوم الحبل الرابط حلّ
يوم ما جونا أولاد الحلة
عديل في وجهة درب الغيمة
عديل ضُلالة ونجمة وخيمة
وكنت براك في وسط الشلة
وكت صنقرتي
الجبل الواقف صنقر
كان يتلفت
عاين ودنقر
حت ما عاين
ما لاقالو وشيشاً غيرك
يشيلو ويقيلو...ويلولي مقيلو
ويقطع وش المطر الأسود
يقطع وش المطر الأسود!!
كان المطر الأسود حوّد
كان الفجر الناير دردق
بي قدامو الليل الهوّد
كان آ بنية عديلك عوّد
كان زغرودة خيرك دوّت
ها مهبوشة
ها تريانة تدفي عشوشا
ها فردوس بالخير مفروشة
مال الزمن الجاير غمتك
كسّر فيك جنحات الطلقة وعمتك
ها دفاية المات بالقرة
فرهدي حلماً يوصل بكرة
يراشي الناس الفقدوا البسمة
وطيبة الروح في حلو الكلمة
يا ستار من ها دي القسمة
يا مرسال الشفقة تهوّن
كلمة شفقة تشبّع جايع
ياتو كلام الشبع جايع
ياتو كلام الصلب أولادك
فوق خشبات العشم الضايع
كنا نشيلو سكاتك حكمة
كنا نشيلو سكاتك حلمة
يا ستار من ها دي القسمة
محناً شتى
تحاصر صيف الريد الشت
ها مهبوشة
زمنك غلبك حلبك
ضرعاً يشبع يرتع يمتع
ودايماً يجود
صبحك شدّ رحالو وبعّد
أريتو يعود
يقشقش ليك الدمع الهتف
ويفتح ليك كم باب مسدود
شان ما تلهلب تاني الضحكة
ونار الفرح البقى هبود
ها مهبوشة
19/2/1998


بجيـلك

بجيلك
من هدير الموج
ومن سكة مشي الضفة
ومن درب النزيف أسكب
غناوي أنيقة ملتفة
بجيلك
لما صمت الليل
يفوت حدو ويزيد لهفة
ولما الوردة
تلبس من حروفك توب
ومن مرض الغرام تشفى
محل ما شوقي يبكي عليك
ووين ما الدهشة تصطف
بجيلك زي شعاع النور
وزي برق المحبة العاش
يداري مجيهو بالصدفة
بجيلك قيف بحر زعلان
تغسّلو دمعة من عاشق
حبيبتو اتغابت العرفة
وقلبو النازف المجروح
بترسم عفتو العفة
تدور الدنيا زي ما تدور
وأقيف عندك
قصيدة خجولة لما تشوف
صفاك تصفى
عليك ذات الحقيقة سؤال
شنو الخلاك
تباري سحابة مجنونة
وبدون كلفة
تقيفي تعايني لي قمراً
سرق أنوارو من وشك
وشيّد همسو ليك غرفة

3/3/1998
صمت الكلام

منو البقدر يشيل صمتي
ويعبّر عنو بالأحرف
ويدونو في شعاع الشمس
بالكلمات
منو البقدر يكون أحلام
وياخد من دموع عيني
ويغسل أسايا بالبسمات
متين يا ليل...
صباح الريد يطل
في دنيا أيامي
تبارح لهفة الأحزان
تبلل شوق قلب ظامي
متين يا قمري إنت تهل
وتطوي ستائر الإظلام
وتبعد سطوة الأوهام
ويسيل المد...
يهد سد الحواجز هد
تعال يا ضو
تعال يا أملي في الماضي
تعال يا رمز حلم الغد
تعال يا رقة الأنفاس
وخت البشرى في الإحساس
وزح السد
عشان ما تزغرد الآهات
عشان ما تكتر البسمات
وتمتد في المدى وتمتد
تجينا البهجة تتشابك
تهاجر في المقل أفراح
وتنزاح الهموم تنهد
ونرجع تاني للأحباب
نهدّي النبض والأعصاب
ونزرع تاني جنب الباب
شجيرات الوئام والود
28/3/1994
وناتا لعيون سعاد

بهواك
قدر ما تمدي إيديك للشمس
عفواً تمد ـ ريدة ـ الشمس
إيديها ليك
وأهواك
مداين من جمال
تدهش عصافيري وأطير
أحلم أرك ما بين عينيك
يا بت بحيرة وطرف ناعس
وقوس قزح
يا بت حديقة بتغرس
الريد في الضفاف
تهديني أكوان من مرح
عيد من فرح
زغرودة لي يوم الزفاف
بهواكي بي لون مختلف
ما شفت قبلك اختلاف
أديني رقراق من ولف
أديك عوالم ائتلاف
يا بهجة يا نور يا عفاف
يا همسة لامست الشغاف
يا موجة تتحدّى الجفاف
يا ضحكة بتهدّي الفؤاد
تقفل شبابيك العناد
تفتح مداين اعتماد
وكتين تطل تظهر
سعاد
والغيمة بتناجي الشمس
تفرد ضفايرا في البلاد
وأنا من أمس
من موكب التاريخ بحس
بيكي وأسافر في عيونك
وما بدس
ريدي وأبوح
يا غالية بي كل الكلام
بهواك
قدر ما تردي يا بت السلام
تدي الصباحات ابتسام
تنسجمي حد الإنسجام
ما بين تضاريس الحروف
الناقشة اسمك في الفؤاد
بيناتنا بس يفضل ميعاد
وكلام نقولو وما معاد
تنزل سحايب ريدنا غيث
تنده نجيماتنا البعاد
تنشر قصائد في سعاد
تنثر قصائد لي سعاد
تثمر قصائد يا سعاد
وأهواكي
يا بلبل بغني ومنشرح
يا عندليب زمني السمح
يا باقية لي إنت الحياة
يفصلني عنك إلا موت
يا رايعة يا كل البيوت
يا فارهة يا نور البيوت
ما طالما الليل ارتحل
حايبني وين العنكبوت؟
ما طالما الخوف ارتحل
حايبني ايه العنكبوت؟
وأهواك
قدر ما تمدي ايديك للشمس
عفواً... تمد ريدا الشمس
أنغام وصوت



وين ألاقيك
وين ألاقيك...
يا المسافر في عيوني
وصرت لي قلبي الشريك
يا الموهّط في الدواخل
منتظر لحظة مجيك
داير أضمك بي رحابة
ومن هجير الحر أضاريك
فجري بشرق من عيونك
تبسم اللحظة وأباريك
السما بتهديك نجوما
وتعزف القمرة المزازيك
والبنيات في الحواري
ليكا بتدق الدلاليك
وين أراضيك؟
الورود عنك بتسأل
وديمة تحلم لو تلاقيك
والضفاف في النيل بتزعل
إلا لو دايماً تماسيك
يبلع الموج ريقو مرة
ويجرف الساس والمداميك
والقصائد في الدفاتر
جوة في بطن الدفاتر
تستعيد أيامنا ديك
وين ألاقيك
حس غنيواتي الحزينة
انبحّ من كتر الكواريك
فيني شوقك كم تجدد
هل تجدد شوقي فيك؟
فيني شوقك كم تدفق
خش بالباب والشبابيك
حلمي دايماً إنت ترجع
موعدك يصبح وشيك
وين ألاقيك
وإنت ناسي الناس أتاريك
وين ألاقيك؟
14/2/2001
طـالـعـة مـني


يا طالعة مني…
وداخلة في جوف السحابة
زارعة في نبضي المحنة
وشاتلة في دربي الصبابة
طمني الناس البتبكي
وفرحي الفقرا الغلابة
المطر يوم بكرة بنزل
يروي واطاتنا ويبابا
بكرة بتغني العنادل
وتحتفل بي ضي شبابا
بكرة راح الفرحة ترجع
بعد ما كانت بتابا




يا طالعة مني...
وداخلة في جوف السحابة
طالعة مني وساكنة جوّاي
من سنين بعرف حسابا
من زمن ما القمرة فاتت
وكنت بسأ ل عن غيابا
بين رموش النجمة شفتك
غنوة بتزيل الكآبة
تبهج المحروم معذب
تهدي للمعول صلابة
تهدي كل طورية وردة
وتدي كل عصفورة غابة

20/8/1998

السمحة الشمعة الدمعة نزيفـا


[1]

الدمعة نزيفك
وجعك طال يا السمحة
وضو الشمعة السافر
رتل في الساحات
إنجيل الذكرى
وغادر قطرو براح الوادي
الدمعة نزيفك
شوفي خريفك
لون المطر... الخضرة
ونارو هجيرك
تحرق شرف الغطى رذاذو سمانا

[2]

دوام نلقاك يا السمحة غنانا
وغيمنا ضرانا
نقابل قمرك ساجد وسط الحوش
ودموعو تهتف
وين الصوت الطوّل صايم؟
وين القلب الكان بي نبضو
بصحّي الحلة
وينو صباحك ووينو عشانا؟
وحس أطفالك روّح وين؟
ديل أطفالك ناموا بدون أحلام
والحزن الخيّم...
وعد المطر الكان مكذوب
الفاتنا بدون ما يوصّف دربو
ودون ما يترك للغابات عنوان

[3]

نلقاك يا السمحة عوافي
بتطلع صافية نية
بتغشى الناس مرضية رضية
وتلقي رجاك أشجارنا صوامع
نحن القلنا عشانك
ندفق حبر الكلمة الشينة
وعاد نلقاك يا السمحة حمامة
لامن بيك يتلاشى
الخوف
ويتقطّع صبر الوادي مراكب

[4]


حتى الشارع كان عن جيتك
دايماً بسأل
ونحن نرد للشارع
رد الخايف ردو يزعل
ونخل الشاطي
الكان في يومن ما مابينا
الليلة يجينا
في إيدو رتينة
عشان ما يشوف السمحة الشمعة
الغالية علينا

[5]


الدمعة تسيل والسمحة تعاني
السمحة رؤانا وأسمى معاني
وزي عصفورة
تغني تغني تغني
وما بتهم
لو كان جنحاتا بقت مكسورة
السمحة صبورة
برغم الدمعة نزيفا
هجيرا وهبة زيفا
تقوم تتوهط
وتبدا تعيش وسط النجمات
مستورة

15/3/1996

صبرك علي
صبرك علي...
يا دابو أتعبني الشجن
يادابو موج العشق هاج
خايف أضيع في الريد وأجن
خطوات سبيلك سلسبيل
بي لهفة ليك خطواتي جن



صبرك علي...
في سمايا طلت نجمتين
بستاني مهجور من سنين
الليلة غنت وردتين
فكيني من قيد السكات
وأديني منك كلمتين
لسة التواصل مستحيل
وأنا بيني بينك خطوتين



صبرك علي...
أنا صدقي بي حبك وشى
أصدح مع الطير في الغصون
وأتغنى همس ووشوشة
وأزيد في ريدك كل يوم
وألقاكي بي ود وانتشا
يا الدربك إنت هوى وجنون
أنا عقلي في دربك مشى


شعري العنيد


وتكلت زرعي علي الرذاذ
ولا مرة من نبعك شرب
انهدّ حيل شعري العنيد
وانسدّ باب راحة القلب



مالك سقيتي الليل سهاد
وأنا صبري من صدك تعب
جرّحتِ قلبي المستكين
ضيّعتِ من خطوي الدرب
ملت مواسمي الإنتظار
وما لاقي جرحي معاكي طب



كم ليكي أخلصت وصبح
جوايا ريدك مستتب
وكتبت فيك أجمل قصيد
ضاع شعري عنك وما كسب
خشيت براي في نار هواك
وأنا كنت قايلو هواك لعب


أنا كنت بحلم بالفرح
بس وضعي بي سببك خِرب
لازمني احساس الضياع
موجوع وحاتك ومنغلب
لا يوم شفق قلبك علي
لا مرة حالي عليك صعب
***هذه القصيدة تغنى بها من ألحانه المطرب عصام محمد نور
ابتسمي

ابتسمي خلي الجو يروق
هدي العواصف والبروق
ينزل مطر ضي بسمتك
يروي البيادر والشقوق
ما بسمتك ميعاد عشق
طلة شمس عز الشروق

ابتسمي
لسة الشوق بفتش سكتك
لسة الظلال خافية الطريق
والنيل يردد غنيتك
والشارع الباكي الحزين
منو الموانع دستك
ابتسمي ما أحلى الصباح
وكتين يطل من بسمتك



ابتسمي يا أروع نغم
صحّى المدائن والحقول
اتحدى صمت الليل وسافر
عانق إيقاعو الفصول
طمّن الحرف المعربد
وعلمو يبادر يقول
تدهش النور ابتسامتك
وتعلن الفرحة الوصول



ابتسمي يا زولة
وتعالي نعلم الناس تبتسم
نتلاقى في الآفاق وميض
والغيم يناديك بالاسم
نتغنى للموج والزهور
ومواقف الريد تنحسم
ابتسمي ما لاقتني قبلك
نجمة يا بت تبتسم


ما سر صمتك
ما سر صمتك
وبينك وبين الغيمة حكاية
ومن تيار الحرقة الجرفك
تبدا فصول الدمعة رواية
ما سر صمتك يا عصفورة
يا غناية شدر الحلة...
يا غناية
يا ضوّاية ليل الحلة
حنانك دفا سلامنا البارد
وفجّر فينا محنة دفينة
داعب نجمك فجر أحزانو
وناغم فجرك نجمة حزينة
ما سر صبرك يا مسكينة؟
وصّف دربك وجع الدنيا
الواقف طولو يشابي يطولك
موسم وعينة
يا مجنونة
يا مسكونة بهاجس خوفك
يا مغبونة
يا موزونة خطاك في الشارع
زمهر مطرك ... زمجر قطرك
يا علمتي الوادي السكتة
يا قدّمتي الدهشة هدية
طيّب عطرك خاطر الوردة
الكانت تهتف بي حنية
ما سر صمتك يا دغرية
إيه الخلى النيل مندسي
ويد النيل لسع ملوية
إيه الخلى الليل متأسي
وكل نجوم الليل وردية
ما سر صمتك يا وردية

16/12/1998
صفا...إنتباه

نازل على قيف الوجع
غيمك
وتر رويان محنة ريد
مسافة تحضنك تلقاك
عذاباتك
بقيت كلمات
مسطرة بى هموم السكة
والرغبات
بسيمة بتطلع الاسواق
تبيعك بى قرش أسود
تكون داسيهو لى يوماً محومر
لسة ما عزفت مزاميرو
تقوم انت وتمد ايدك
تبحلق فى المدى المرسوم
حكاية جميلة بالالوان
تعيش إنسان
تموت إنسان
قليبك يتسع تبنيهو
من جيهة هواك
قطية من قصب السماح
غنوات
مشاويرك... سواد ليلك...
حلم قلع مساميرك
بكيت فى حرقة
وإنجرحن مساديرك
هديلك جنك الموجات
زمان ماقلت بتدورن
هديلك جن
تشوف النخلة تتمشط
تحدّر ليك تشك وتظن
وإنت تقول كفاك الهم
كفاى درباً ممدد
زى رموش زولاَ
بريدو أنا وبعرفو براى
وتبدا الضحكة تبكى عليك
عرفتك
يومك الخليت حنينك وجيت
مستف لينا شنطة شوقك الشفناهو
نحن زمان كلام تانى
كلام لامقرى لامكتوب
كلام لامبدى لامتناهى لامشطوب
كلام زى رعشة الفانوس
لو اتساوى الضلام والضو
وزى زغرودة القمرية
لما يذوب
وسط آهاتا حس مسلوب
مسافر فيك
معطر بيك
ونازف من دواخلى عرق
كلام مكبوت
بعد طولة سجنتو مرق
اريت ريدك يجينى حريق
عشان انده واقول فى الناس
اريد ريدك
محل مايندمل
جرح السحابة زمان
تمد إيدك
أريد ريدك
وكت مايشتهى الشارع
مواعيدك
اريد ريدك
يمد الليل سوادو شدر
ويعبى يكيل مراويدك
يفوت ضلك
يخليك فى الهجيرة خيال
ملفح دهشة واستعجال
وتانى تعود وتتبسّط
تشوف النخلة تتمشط
تحدر ليك
تطنطن فوقا قمرية
وتناديك إنت وحيدك
تفرّش ليك درب حلمك
رسائل شوق
تزيد من فوق علاويك فوق
ويرقص ضلك المشنوق
سفر مستنى
لوحة صمتو تتكلم
تعود من تانى تتبسط
تشوف النخلة تتمشط
تحدّر ليك…
3/12/1997


راجياك أنا

راجياك أنا
يا بسمة من عمر الزمان
راجياها واحسب كم سنة
تديني من نورا الشعاع
تهديني إلهام الغنا

* * *
راجياك انا
يا أغلى حب عاش الدهور
يا مرسى أحلام السنين
يا بسمة في أحلى الثغور
شايلاكا في حدق العيون
خاتاكا جوة قليبي نور
راسماكا في لوحة هواي
وهواكا ممتد في الجذور

* * *
راجياك أنا
وجواي غرام من بدري بان
ما انت أحلامي الجميلة
بتبقى لي بهجة وأمان
لما المشاوير تبتدي
وأيامنا يملاها الحنان
لما المحبة تسوق خطانا
وبالعبير تملا المكان
* * *
لما النجيمات ترتعش
أنا بقرا في عيونك كلام
أمسح دموعي وابتسم
ما أحلى فيض الإبتسام
وألقاكا في عز الهجير
تحميني زي ضروة وغمام
نتحدّى حتى المستحيل
ونهد حدود الإنهزام
راجياك أنا
16/11/1992

***هذه القصيدة تغنت بها المطربة نبوية الملاك من ألحان اسماعيل عبدالقادر



وكتين شفتك

شفتك شاقة بحور الليل
متخبية جوة قصيدة
تغني وتصدح
شفتك شايلة الفجر البدري مراية
وضامة الغيم فوق كتفك ملفح
وكانت عين النيل بكاية
وقلبو دوام كان بجمع وبطرح


شلت الحسرة الطاوياني
ودمعات دفاقة وجرحاً بنتح
شان ألقاك ياحلمي الراحل
ياساساق ما بين الصحرا
وبين البحر النشر الخضرة
وصدراً واسع بغفر ويصفح
شفتك شايلة القمرا حقيبة
ولابسة وميض النجمة قلادة
عيونك تفضح معنى سكوتك
ومعنى غياب الفرح الروّح



عشنا وشفنا مسافة ردك
مابين حنك ونفرة صدك
تصبح ضو فى قبضة يدك
ترسم جانب لوحة وملمح
وكان الموج فوق صدرك بمرح
وكتين شفتك
شايلة الفجر البدرى مراية
وضامة الغيم فوق كتفك ملفح
3/12/1996

أبدأ منك

لو مرة نام
سهري المجرّح فى عيونك
سكة الشقا فى الشوارع
تبدا تحلم بالوصال المستحيل
تلقانى بعدك فى الفيافى
اشكّل النغم المصبّح
وإعتراف الكلمة بى قتل الضلام
أو إعتراف الضلمة بى قتل الكلام
معذورة لو كان
قلتى لى قصة هواك
أو جبتي من جواك قصيدة
وشلتي باقي دموعي
غسلتي المداين
وانكفيتي
على قفا الزمان البهضرب
ابدا منك
من نزيف احلامك المغسولة
بى موية الرهاب
من خريف دمعاتك المعسولة
من هجر الغياب
ابدا من خوفك
علي اغرق براي
مسفوك دم الغنا والنشيد
محروق حجاك النام معاي
ياريت عيونك بالنعاس الفيها
ترضى تظلل أشعاري وغناي
وأبدأ منك
من شروق لمحة هواك
الكان قبيل
كم فى الفواصل من وصال
كم فى المقاصل إتصال
لكنى رغماً عن شوارع الليل
بريدك
واستعيدك
شعلة اللهب البغازل
قلبى من اقرب وريد
ياسطوة الشوق البعاند
وصفوة الريد الجديد
لو غبت عنك
فى المسارات أبدأ منك
واستعيد لحظات وجودك
و الأماسي الأسعدنك
وأبدأ منك

15/4/1998

طيف رؤاي


يا نجمة الليل الشحيح
يا طيف رؤاي المشتهى
يا بلسم القلب الجريح
أنا جرحي منك ما انتهى
فى شعري كم قولاً صريح
غمر المساحات كلها
صفق على القيف النخيل
ما ملّ صبرو ولا سهى
والنورس الراحل حزين
وانا حالتي حالتو بتشبها
كم فى هواك مجرحين
كم من حزانى مولهة
حتى الحروف قاست معاكي
وصد عنادك توها
بى جبرتك تيهي...
وحلاة الجبرة بتزيدك بَها
خايف دروبك تبعدك عنى
وأضيع فيك اشتها
فى عيونك الحان الخريف
إيه يعنى بس عين المها
والكون معاك زغرد فرح
زين ملامحو وازدهى
لو كان عيونك مبتداى
تصبح عيونك منتهى
أو جرحى هدّاه النزيف
تبقى الجروح فى محلها
يا قلبي اصبر لا عليك
يوم بكرة الله بحلها
26/4/2000
زعل الهوادج

كنت بين الصدفة والوعد المتاح
القاك معلق فى النجوم
تصطاد من العتمة الصباح
تغزل من الهمسات نغيمة
ومن هجير الشمس غيمة
كنت بلقاك…
لقمة فى حلق الغلابة
كنت بطراك وادي وادي
وكنت برعاك غابة غابة



يا بهجة القمر البسافر
فى هدير الموج وحبات المطر
يادمعة الندم التسيل
تغسل صبابات الشجر
سافر معاك حلمى القديم
شايلك وفا ولحظة صفا
وجنة نعيم
يامسكن الفرح الملاذ
يا ضو ليالينا اللذاذ
ياحس قمارينا البيمسح
من نغيماتنا النشاز
كنت بطراك وادي وادي
وكنت برعاك غابة غابة



خاطري فى الليل انشده
رتق جفون المستحيل
مزّق ضباب الاندهاش
ضاعت قوافل هجعتو
وغابت مواسم رجعتو
لما الهوادج
فارقت حلم القماري
وبادرت فى غمرة الهم والزعل
ودعت رمل المحنّة
وصادرت طول المسافة
كنت برتاح لما ألقاك
تغسل الخوف بالصلابة
وتبعد الهم بالدعابة
لما ألقاك...
تنسج الأنات موسيقى
وتطرد الزعل الرحابة
كنت بطراك وادي وادي
وكنت برعاك غابة غابة
9/1/1996

الريح والصدى


راسمك على الريح والصدى
متحدي بيك طول المدى
مجبور ألازم سكتك
وأنا بقدر أعمل غير كدة؟


الدنيا قالت كلمتا
عاشقك متابع سنتا
صابر على الشوق الكتير
أزهاري عينيك جنتا
أسباب شقاي متعددة
وأنا بقدر أعمل غير كدة؟



عفواً إذا تاهت خطاي
وبكت هواك أحرف غناي
محتاجك إنت تعودي لي
تحضن نجيماتك سماي
أسعد إذا حرفك شدا
وأنا بقدر أعمل غير كدة؟



بوصيكي يا الطبعك رزين
بي حق قليبي المستكين
لاقيني ما يطول الغياب
ما تجددي جراح السنين
فيني الجراح متجددة
وأنا بقدر أعمل غير كدة؟


الصدى البكاي

أقول لو في الحلم ألقاك
أقيف متشمس أترجاك
تعاين لي خيول الريد
تقول لي قلبي شن ودّاك
وأنا السايق معاي الغيم
أصونك من حريق الضيم
أخلي الفرحة تمشي وراك
وبترجاك
مع الشجر البطاردو الليل
مع الشجن الطفا القنديل
وبترجاك
جروح من تاني تتجدد
وهم برحل وهم برتد
أنا الراجيك
على خط العشم شاتل
نخيل الغنية في كتفي
وأناجي هواك
أقول للماضي ما أدراك
ما أدراك ما أدراك ما أدراك
وأظل متشمس أترجاك
أشوف القمرة خجلانة
بتناديني
ويكون الشوق
على كل المواني سكن
وما بسكن حنيني وشوق
عمل في قلبي بيت ووطن
ألاقي النيل
مغتغت بالطمي الداكن
يهدهد حضنو ريف ومدن
وأنا الويحيد
معاي نجمات صغار يحبن
وكيف ما أكون براي أحسب
حسابات الرحيل المر
حريق وشجن
إذا ما كان ختاني الغيث
وخيب في المسافة الظن
أقيف عندك
عشم مخنوق... هجير ومحن
أقيف عندك
حلم ضاعت معالمو سدن
أقيف عندك
شروق لا طل صبحو علي
ولا كحل الشعاع عيني
ولا جمرات لهيبو خبن
تكون كل الطيوف جايات
يضل عصفور ويصل عصفور
يعيش في الضل
وترفع غنوتو الرايات
تزازي الحلمة من عين
الصدى البكاي
وتسرق دهشتو الغايات
تقابلني الفِرد كلمة
وتمد جدول فرح رقاص
زلالاً يغسل السيّات
فيا صمت السما المفقود
سألتك بالذي رسم الحروف غنيات
وبي مسدار عشق طاهر
يقد عين الرعاش والخوف
منو النهب الفرح زندية
خلى الريد حلم منتوف
ساًلتك بالذى رسم الغناوى حروف
وكسّر بالحروف الصد
وخلى حروفنا تبقى سيوف
عشان ما حرقة الزمن
الطريقو صبح هوان وعزوف
تفوت درباً دوام تواه
تروح الآهة بعد الآه
ويعود الدربو ما معروف
وصلنا الحد
حدود الماضى لو تنهد
لحقنا الحد
دا ياريت لو رفعنا الحِد
نخت فوق القصيدة عتاب
بدل غنوة اليجن جرحين
نخت تحت السحابة سحاب
يطير النم بدون جنحين
نقفل الباب
دميعات الشقاوة تكب
مطرة الريد بتابى تصب
وأظل متشمس أترجاك
مواعيدك تجي وبتروح
نخيلك فى الفيافي ينوح
وبترجاك
وبترجاك
هداك القمري ما عشعش
ولا عادن برنلو جروح
جرح ينزف جروح وجروح
ويا تنزل تياب حِدّك
تقيف من تاني في حَدّك
ويا تنزل مطر من فوق
يكون رمش البرق ردك
ويا تنزل مطر من فوق
يكون هدر الرعد ردك
ويا تنزل مطر من فوق

12/10/1997

الثلاثاء، 21 أكتوبر 2008

إيهاب الأمين: مواسم الانتظار فيديو#links

إيهاب الأمين: مكتبة شعرية صوتية

مكتبة شعرية صوتية

بتمناك http://upload.ps/wex7qqvzb7r9/btmnak.mp3.htm

قصة قصيرة
http://upload.ps/o7pm49kgypru/gissa.mp3.htm

بت من نور
http://upload.ps/gdwmv4bmw7fn/bitminor.mp3.htm

وعد الغمامات
http://upload.ps/lqwyg6g57ozb/wadghamat.mp3.htm

وين ألاقيك
http://upload.ps/r0fbaq425hph/wenalgk.mp3.htm

سوناتا لعيون سعاد
http://upload.ps/u03lgwylj6iu/sonata.mp3.htm

شعري العنيد
http://upload.ps/h20xj6zohktq/shiry.mp3.htm


طالعة مني
http://upload.ps/e0urmqghv76l/talaa.mp3.htm


صمت الكلام
http://upload.ps/lx6p0aaz5r0x/smt.mp3.htm


ماسرصمتك
http://upload.ps/vixeaphzjlin/sirsmtk.mp3.htm

السمحة الشمعة الدمعة نزيفا
http://upload.ps/ryo5njz5qyfg/samha.mp3.htm


ابتسمي
http://upload.ps/nssdb0dkp21o/ibtsmi.mp3.htm

قولة أهلاً
http://upload.ps/o283lq2suolu/golt.mp3.htm

حزن المراكبية
http://upload.ps/cd98zgzjhi7b/hozn.mp3.htm

اصطفيتك
http://upload.ps/4gqwgtx4gota/istfetk.mp3.htm

استنيتك
http://upload.ps/4o053bdyxu5s/istnetk.mp3.htm

ربك لطف
http://upload.ps/k0wnj733ds2q/lataf.mp3.htm

المهبوشة
http://upload.ps/8regr1zvab0o/mhbush.mp3.htm

من وين معاك
http://upload.ps/umy3jsj9op47/minwen.mp3.htm

عيونك والمطر
http://upload.ps/8xz3rpow6u35/oyunikmatr.mp3.htm

ست الشعور
http://upload.ps/oqthxwcm5xwf/sitshoor.mp3.htm

بت يا ريم
http://upload.ps/frzhta3ua5df/reem.mp3.htm

الثلاثاء، 7 أكتوبر 2008

لون المغرب بالصورة والصوت



لــون المـغـرب
مجموعة شعرية

إيهاب الأمين
إهـــداء


إلى الرجل الذي نسج من رهقه
وعرقه وصبره وسادة ارتحت عليها...
رجل كما الوطن...
يعطي ولا ينتظر المقابل
الشاعر ... المعلم ... الإنسان
الذي علمني معنى أن أحيا
من أجل الآخرين
والدي الحبيب...
إليه أهدي قصائدي...
وحباً بلا حدود
إيهاب الأمين محمـــد

تقديم

إيهاب الأمين شاعر من طراز خاص،وصوت شعري جديد،والمقصود بالجدة هنا الإضافة الحقيقية لميلاد الشعراء والقصائد... فالساحة الشعرية تعج بالعشرات والعشرات ممّـن يحاولون كتابة الشعرغير أن معظم هؤلاء الشباب يضعون الحافر فوق الحافر، وتبدأ لديهم عملية اجترار مفردات قديمة مستهلكة ومضامين مكرورة لكن شاعرنا الرائع إيهاب الأمين ينأى عن هذا النهج فنراه قد أرهق نفسه بالبحث عن الجديد كحال كل المبدعين الحقيقيين، وأرهق شاعريته عند بناء معمار قصائده فأخذ يهجّـن بين الرمز والمباشرة، والفصحى والعامية، ويعطي قصائده من نفسه صدقاً وروعة لا تجارى،فيمنح قصيدته قدرة على المواكبة وطعماً جديداً ولوناً يحمل خصوصية عطاء إيهاب الإبداعي... وأحسب أنه قد مزق نصوصاً كتبها حين أعمل فيها حسه النقدي حتى لا يكرر قصائد موجودة في الساحة...
الغنائية ملاحظة بشكل واضح في (لون المغرب) الشئ الذي يجعل معظم قصائد المجموعة مهيأة للتلحين والغناء...
عموماً أيها القارئ الكريم هاهي المجموعة أمامك ولابد أن يكون لك رأي عند قراءتها قد يتفق معي في الذي أوردته ولإيهاب الأمين خالص الأمنيات وأطيبها...

التجاني حاج موسى

أمدرمان 14/5/2007

لون المغرب...
أو مدن الدهشة الشعرية

مختار دفع الله

كما ولا يمكن إلا أن يكون الشعر ويكون التدفق الوجداني المثقل بإيقاعات الفرح والحزن كان ويكون إبداع الشاعر إيهاب الأمين هذا الوتر المجروح النازف في حنجرة شعرنا العامي الأصيل... وإيهاب صوت شعري ينساب عبر الدواخل متسرباً إليها من خلال مسامات البوح في الليالي المقمرة على ضفاف النيل...
تراه عند كل صباح يمارس عشقه في اصطياد الحروف المونقة والتي تشكل أزهار الحديقة الشعرية الخاصة به بكل رونقها وأريجها. والقصيدة عند إيهاب كائن حي تسمعه ويسمعك ويمنحك الإيحاء... إنها القصيدة اللوحة والقصيدة العصفور والقصيدة النهر التي ما أن تلقي بشباكك حتى وتمتلئ بالجوهر الفريد من القصيد الآسر والذي ما أن تقرأه حتى وتمتلئ جوانحك بشتى الصور يضاف إلى ذلك قدراته العالية في التصوير عبر الحروف والخيال المدهش فاللوحة الشعرية عنده تنبي وتسفر عن تلك الملكات الرفيعة في الرسم بالكلمات... وإيهاب الأمين تحمد له تلك الخاصية المتميزة في التفرد والتميز من خلال صوته الشعري الفريد والذي لا يماثل ولا يشابه صوتاً سبقه من رواد هذا اللون من الشعر أو حتى من أصوات أقرانه وأترابه من شعراء جيله؛ فبرغم أنه كان يتكئ على تجارب من سبقوه من أساتذته الشعراء إلا أنه حمل فأسه على كتفه وراح يشق طريقه في غابة الإبداع يمارس الاحتطاب الشعري بصورة يحسده عليها الآخرون، لذا كانت أشعاره تعكس بشكل حقيقي وواقعي آماله وتطلعاته...أحزانه ونبضاته ومع ذلك هي المعبر عن تطلعاته عبر أحلامه المشروعة عشقاً وذوباً ووجداً،واحساسه بالآخرين وأوجاعهم، وبالوطن وقضاياه.
إيهاب الأمين هو من رياحين الجيل الذي تلانا في مسرح الشعر العامي ولا أخالني مشتطاً إن قلت بأن صوته الشعري يمثل فتحاً جديداً في عالم القصيدة العامية فهو بارع في استلهام قصائده من نبض الشارع العريض لذا تجئ القصيدة لديه بلسان الإنسان البسيط في كل صقع وبادية من هذا الوطن المترامي الأطراف.
وحينما عرض عليَّ أخي العزيز المبدع إيهاب الأمين أن أكتب أسطراً عن اصدارته الجديدة (لون المغرب) ترددت كثيراً في أن أفعل ذلك لسبب لا يخفى على المقربين من أصدقائنا المشتركين وهو أن شهادتي في إيهاب وشعره مجروحة لا تحمل صفة الحياد فإيهاب مني وأنا منه لكن الحقيقة المجردة التي لا مراء فيها ولا جدال أن (لون المغرب) يشكل إضافة ثرية لمكتبة الشعر العامي السوداني وهي إحدى المحاولات الجادة لأبناء هذا الجيل لرفد حركة الشعر العامي مع مساعٍ جادة للارتقاء بالذوق العام وإثراء وجدان الأمة بالروائع من الشعر الجميل والخالد.

مختار دفع الله
نائب الأمين العام
اتحاد شعراء الأغنية السودانية
أمدرمان 17مايو 2007

لون المغرب... لون الفرح

عديت على الزمن الأسيف
ووقفت بين النجمة والقمر الكسيف
ونزفت لامن كسَّـر القيف النزيف
مستني لو تمطر سماي...
فارش همومي على الرصيف
فاتح قليبي علي الرصيف
متوطي جمر الإنتظار
وانقدَّ فيني الكان رهيف
إيهاب الأمين... أحد الأصوات الشعرية الجادة التي فرضت وجودها بمفرداتها المتميزة والجديدة، وهو صاحب حس شفيف وشاعرية صادقة وموهبة فذة، امتلك أدواته فأتقن الفعل الإبداعي تعينه في ذلك ثقافة عالية وخيال خصب واحساس عالٍ... ارتبط إيهاب الأمين بأغنية (صمت الكلام) والتي أصبح اسمها عنواناً لديوانه الأول الصادر في مارس 2007 والذي حقق النجاح ونال الإعجاب.
ولعل عمل إيهاب الأمين الإعلامي باعتباره مذيعاً مجيداً ولامعاً وصحافياً بارعاً وإعداده للعديد من البرامج الإذاعية والتلفزيونية ساهم كثيراً في بلورة أفكاره وفتح له باب الاحتكاك بالآخرين والإحساس بهم الشئ الذي جعله يحسن التعبير وتتنوع مفرداته وتتميز، وأمامي الآن ديوانه الشعري الجديد (لون المغرب) الذي يحتوي على (32) قصيدة تحكي كل واحدة عن إبداع لا متناهي وروعة لا تضاهى وعبقرية لا مثيل لها... ولا عجب لأن إيهاب الأمين صوت شعري فريد أثبت وجوداً وولج إلى دواخل الناس.
باطلاعي السريع على (لون المغرب) أخذتني الشاعرية الدافقة في شعر هذا المبدع متعدد المواهب وسافر بي الجرس الموسيقي الصاخب الذي لازم كل قصائده وإيهاب الأمين يتميز بين أبناء جيله بأنه يكاد يكون الوحيد الذي لا (يكسر) الوزن الشعري وتنساب موسيقاه على أروع ما يكون، وقد شهدت بداياته وأدهشني وبهرني فبشرت بمولده شاعراً موهوباً، ومبدعاً بارعاً، وأعلنت هذا من خلال كتاباتي الصحفية ولقاءاتي المسموعة والمشاهدة، وهو لم يغتال توقعي فهاهو قد ملأ الساحات الفنية والثقافية إبداعاً أزاح عن أسماعنا سخف المفردات الباهتة التي تسللت إلينا من خلال بعض الألبومات الغنائية والمنابر الإعلامية...
كنت معاي في خيمة شعري
وكنت وحيد وكتين ناديتك
وأنا اخترتك كلمة وحلمة
ويوم ورا يوم أنا استنيتك
ولمَّـن جيتي بقيتي مدينة
مقفلة بابا وبرضي رجيتك
يا موجودة وكت ما غبتي
ويا مافيشة وكت لاقيتك
لا أطيل عليكم أحباب حلو الكلام... وأترككم في سياحة مع مفردات هذا المبدع الرائع.

مع محبتي وتحياتي
تاج السر عباس
الأمين العام لاتحاد شعراء الأغنية السودانية
أمدرمان 17/5/2007



حزن المراكبية

(1)

جاييك وراجياني البيوت
ختف الصقر مني الخيوت
الحلمة والوعد اليموت
مالك علي يا زمهرير
مالك مطنش رغبتي
وهازم دريبات السكوت
وكتين نزل عرق السحاب
سرق النجيمات عنكبوت

(2)

جاييك معبَّق بالهتاف
كل القصائد جاية ليك
مغشوشة بي ظن الزفاف
والغنية انتكلت علَيْ
قايلاني بي حالي القديم
لاقتني مقطوع من خلاف
مسكينة عين شمس المدينة
العايشة بالشح والكفاف
مسكينة عين شمس المدينة
المارقة للربا والتلاف
مسكين بحرنا
الكان غرق جوة البحر
لا مرفا... لا بر...لا نشاف
يا ربي ألهمني الصبر
نجيني بس مما أخاف
وكتين نزل عرق السحاب
كتل المراكبية الرعاف

(3)

عدّيت على الزمن الأسيف
ووقفت بين النجمة والقمر الكسيف
ونزفت لامن كسّر القيف النزيف
مستني لو تمطر سماي
فارش همومي على الرصيف
فاتح قليبي على الرصيف
متوطي جمر الإنتظار
وانقدّ فيني الكان رهيف
سبحانك الأديتني مطمورة حزن
وما أديتني لو هين من خريف



5/10/1999

اصـطـفيتك

اصطفيتك
نجمة في ليلي الطويل
أنا كنت راصد دربي بيها
كنت داخرك للمسافات
البتبكي عيوني فيها
وكنت دايرك تبقي لَيْ
شمسي البتشرق
وانتظر في شوق مجيها
لما طال حبل الصبر
ما عرفت بس لي نهايتو جيهة
* * *
كنت دايرك ترأفي وتتعطفي
وتشتاقي زي أشواقي ليكي
كنت برتاح لما أحلم بي عيونك
لما أطراك واشتهيكي
كنت بنتظر المواعيد البتفرِح
جاية منك وماشة ليكي
إلا راح الكان رجيتو
وخاب عشم دنيايا فيكي
* * *
اصطفيتك
يا سراب غشاني نهرو
وانتظرتك ليل طويل
مستني فجرو
وديمة راجيك
بي حنين حرّقني جمرو
عشان هواك يا ست هواي
حيّرني أمرو
عشان دوام أنا ليكي وافي
وانت ما أدِّيتي بس لوفايا قدرو
28/10/1996
بت يا ريم

يا بت يا ريم
من بين النشوة الملت أعطافك
طلت ضحكة وغِشت الوادي
صباح ونعيم
احتجّ الليل والوردة تزورك
ترقص ليك وتصحّي الدنيا
غنا وتقسيم
أنا شفتك طالعة...
بنفسجة تنسج حلم الغابة
وماشي وراك بي لهفة الغيم
وأنا مستني براي وحداني
راجي يعود الفرح الغاب
يا المالية شوارع الحلة تساب
يا الشايلة غناوي الحلة تساب
يا الدافقة بهاك في الغيمة
وكاسية مدايني ضباب
يا الدافنة هواك في الغيمة
وكاسية مدايني عذاب
يا بت يا ريم
ما تشوفي الحسرة الملت الخاطر
ودرب الخوف المُر وأليم
يطلع ليك من شوقي توسل
أطلع ليك من وجعي قرنفل
ألقى ضفاف نهديك المرسى
ومن عينيك يشرق يوم باكر
زاهي وزاهر... باهي وسيم
يا بت يا ريم
يا طلعة شمس الدهشة
الراسمة حروف أشواقا كتاب
هل كان اللقيا تمني
أم كان الوعد سراب
لو تدنو ملامحك مني
أديها ملام وعتاب
يا واضحة طويلة وشامخة
يا واضحة صريحة وشامخة
هل يبقى غرامي تجني
ويشعل في الشعر احساسو
ومقفول من دونو الباب!!
مقفول من دوني الباب!!
يا الدافقة بهاك في الغيمة
وكاسية مدايني ضباب
يا الدافنة هواك في الغيمة
وتاركة مدايني خراب
يا بت يا ريم
أنا شفتك طالعة
بنفسجة تنسج حلم الغابة
وماشي وراك بي لهفة الغيم


23/7/1999


وعد الغمامات

أمسياتي الحالمة جنّـك
دغدَغِن شوق التلاقي
ومن ضلامن كحّلنك
والنجيمات ما بفوتن
لو ما بي شوقن غِشنك
والقصايد ليك بقولن
ويكتبن بالريدة عنك
* * *
ما أظنك...
تنسي ما بين أمنياتك
إني لا زال ليك ومنك
وإني مستني الخواطر
في الغمامات يوعدنك
المواني تدور فنارك
والفنارات يشتهنك
والخيول في عز صهيلن
والعصافير في رحيلن
يحلمن لو يوصلنك
شوفي ليلات السهاد
كيف شلهتني وشهّلنك
عذبني وشيّلنك
ضيّعني وسيّرنك
سهّرني وهدهدنك
خوفي من سكك الضياع واللوعة
زي ما جرّحني يجرِّحنك
خوفي من لحظات تعيسة
يوجِّعني ويفجعنك
خوفي تبعد بيك ظنونك
وتاني ليْ ما يرجِّعنك
19/4/2000
ست الشعور

يا سيدة يا ست الشعور الما نضب
فتشت ليك
في كل حارات القوافي
وفي القصيد الما كَضَب
وسألت عنك
كنت دايرك تطفي بالريدة اللهب
يا أصفى من كل الصوافي
وأحلى من طعم العنب
* * *

بسمة فرح منك تطوف
تغسل من المدن التعب
بتفرِّح المتعوس سنين
وتودِّر الشين الكعب
يا سيدة الزين والسماح
يا غالية زي مجلي الدهب
يا أصفى من كل الصوافي
وأحلى من طعم العنب
* * *

يا سيدة بكتب ليك حروف
وأجمل حروفي الما انكتب
يا أسمى من كل المعاني
وأعلى من كل الرتب
فرحان إليك الغيم بسافر
ويطرب البلبل يغني
وتسقِط النخلة الرطب
يا أصفى من كل الصوافي
وأحلى من طعم العنب
7/4/1998

قصة قصيرة

ناهد بتسأل في الغيوم
مالا المواعيد انزوت
مالا النجوم نورا اندحر
مالا المسرات انطوت
فرح الغنيوات انتحر
غابت خطوط شمس الصباح
سالت دموع عين البحر
ناهد تغني
وتروي أشواق الشجر
عاتبت شجن القصيد
حزن القصائد انفجر
مشوار يطول
تنتح جروح وهج البريق
تنزل دموع أهل الفريق
تسقي الأرض...
تسقي اليباس...
تروي الشقوق
كل الغبش سابوا الضحك
لما الوجع شد العروق
ناهد تناهد في الطريق
درب الحزن
من بدري ما عرفتلو حد
كانت بتحلب كل يوم
ضرع الهموم الباقية سد
باب انفتح...
باب انقفل...
باباً موصّد فوقا جد
ناهد بتسأل كم سؤال
لي هسة بس ما لاقية رد
18/3/1997

بت من نور

بكتب ليك يا بت من نور
وأرسم ليك من عشقي مداين
وأفتح ليك من ريدي بحور
إنت عبير في أروع زهرة
أريجك دغدغ فيني شعور

* * *

بكتب ليك بي شوق بي لهفة
وبشرح ليك وكتين الحب
يجتاز الحد والخوف والساتر
روعة قصة بتخلق رعشة
وتهزم غيم الدهشة الماطر
وين يا بت بتغيب الفرحة
ووين يا لون برتاح في لوحة
بتخفي مشاعر
بنسج ليك أحلام خفاقة
وبكتب ليك من (عمقي العاشر)
ولمن تفتح عينها الزهرة
بكون مبهور بي حس الشاعر
يا السافرت معاي في الذكرى
ويا الهاجرت دوام في الخاطر

* * *

إنت معاي يا أحلى مشاعر
ومضة حب بتزيل الضلمة
وهمسة موج في البحر الثائر
وإنت معاي بنطول النجمة
ويبوح الليل بالفجر الزائر
إنت معاي يا بت من نور
في أنبل كلمة وأجمل معنى
وأسمى مشاعر

25/10/1996


تراتيل الشمس... فانوس

محل ضلك نزل... بنزِل
محل حتَّ الصفق بنساب
دغش بدري النخيل سافر
دفق مويتو العليها الرَّك
وطارد في الفيافي رهاب
شِفِـق نور الصباح بَربَح
ضلام العتمة بالهضريب
دفق في الشارع المنحوس
بواقي الدمعة والسكليب
ولا الشارع زمان منحوس
ولا الشارع زمان ملحوس
ولا الشارع طرد فانوس
ولا الشارع زمان راقد
ينفّـض من عيونو النوم
ولا الشارع زمان راكد
بيوت حلتنا حلفن ما يبيتن ليل
مع الحلم الجفل شارد
عيان وبيان
قمر حلتنا اتسولب قدل عريان
وكان الغيم حسبني مدان
أهز كتف الخريف وأسرح
إذا ما كان أوانك آن




زبد البحر الناشب ضفرو
خلى القمرة وسكن الغابة
بكت الغنية ونشف الواقف
في الوديان مشرور
كنا تلاتة رجال وسحابة
فتنا القمرة سكنا الغابة
ما يتزلزل ما يتزلزل
إلا السبقت شوقو صبابة
كنا تلاتة رجال وسحابة
وكنت براي اللف الليل
جلبابو عليَّ
وكنت الشايل فكري الحائر
وضامّي براي أنا همِّي البيّ
فجأة تضوي العتمة شهابة
أنزل أنزل
بطن الحوت مرات بتخاوي
وجوة الجب تكسيكَ مهابة
كنا تلاتة رجال وسحابة
كنا تلاتة رجال وغلابة
كنا تلاتة رجال

3/12/1998



اسـتـنـيـتـك

استنيتك
بين الشوق ورؤاي والحيرة
وكتين هبّت ريح اللهفة
ودسّت فيني دواعي الغيرة
فجأة عليّ شموسك شرقت
مسحت دمعة ووحشة مريرة
ضوّت لي دروب أحلامي
وكان أحلامي دروبا عسيرة
وكانت رحلة مشيتـا معاكي
وسفر الريدة جراحو خطيرة

* * *

استنيتك
وعداً لامس شعري
ودوزن نغمة مثيرة
استنيتك ولو لاقيتك
قبل أتوه في الهم والحيرة
كان الدنيا شقاها اتغيّر
وعارف عمري مسافتو قصيرة
وكان مشوار الحزن الطوّل
عشتو معاك في جنة نضيرة
وكان الفرح استوطن قلبي
وتوّجك إنت عليهو أميرة
قبل أموت بالحرقة أسافر
وشعري يعيش جنحاتو كسيرة
أنا يا غالية عشقت عيونك
وفي لحظات أصبحت أسيرا

25/1/1999
تـحـيـة


بين الريدة وطيبة الخاطر
ليك كلماتي بسوقا هدية
أحاول وصفك لو كان أقدر
إنت صفاتك ما عادية
إنت البحر الشقّ طريقو
وشال عوامو ودفع الدية

* * *

شُفت ورود في الساحة بترقص
شُفت نجوم طلعت صبحية
وكل شوارع البلد اتّحَدت
ترسم عشقك عاقدة النية
حتى حروف الكلمة الصعبة
كانت تصدح بي حنية
تشتل وعدك في دنياها
وتفضل مخلصة ليك ووفية

* * *

يا متهجّسة في أيامك
بي آلام الوطن الـهـِيّ
بي أطفال في الشارع ضاعوا
ويد تربال مغلوب ملوية
بي أحلام الأمة السكبت
كل رؤاها ضيا وحرية
وفجراً لسع منتظرنو
ووعد الثورة المابي الجيّة

* * *

يا مهمومة بشعبك وناسك
يا مفروشة نضال وقضية
حـقـقي قولك فيني تعالي
وأفتحي كم صفحات مطوية
برغم الريد الفيني مخبّأ
ما بتشابا لريدك ليّ
وماهو قصيد البكتبو عنك
بس مني اعتبريها تحية


11/10/1999

إلى من لا يهمها الأمر


ما حاولت أعاند الفكرة
ولا قفـّلت أبواب الذكرى
أنا تاتيتك حد القيفة
لقيتك داخلة الموية العِكرة
وأنا ناشدتك عقلي الصاحي
قمتِ علي ضاعفتي السكرة

* * *

كنت بخاف أنا مني عليكي
يجرِّح قولي مداين حِسِّك
كنت بخاف أتأخّــر لحظة
ويبدا الفيني يبادر يمسِّـك
كنت بخاف النجمة تغشك
أحاول من النجمة أدسِّـك
إلا براك فكِّـيتي السكة
وكنت براي البيكْ متمسِّـك

* * *

صاقرني بلاكي الشوق الجارف
واتوهَّـدت الورق الأبيض راجز
قلت أشوف عينيك واتحاكَـم
وأهدم تاني سدود وحواجز
ياما احسنت الظن في حكمك
قايل حكمك عادل وناجز
سقت قصايدي سفاين ليكي
وإتحدِّيت الحرف العاجز

* * *

أنا مستسلم يا عصفورة
وراضي اتعوَّض حبي جراح
وأنا رشحتك ملكة وغيمة
وليك كمَّـلت العمـرِ سماح
إلا الصورة اهتزت نـزَّت
ليل متواصل ومافي صباح
أوّل مرة يخيب تقديري
بعد ما قلت حسبتها صاح

* * *

فيك حدَّدت مناخ المنفى
وبيك جدَّدت الأمل الواهي
سِبْت ملامحك فيني تفرهِـد
فرحان بيها ودايماً أباهي
قبْلِ أشوفك وسرك ذايع
قصة جديدة وريد متناهي
شان الحيرة معاي تتحيَّر
حيرة تحيِّر جد باللــــهِ

* * *
كنتِ معاي في خيمة شعري
وكنت وحيد وكتين ناديتك
وأنا اخترتك كلمة وحلمة
ويوم ورا يوم أنا استنيتك
ولـمّـن جيتي بقيتي مدينة
مقفِّـلة بابا وبرضي رجيتك
يا موجودة وكِت ما غبتي
ويا مافيشة وكِت لاقيتك


26/2/2003
أنـســـاها

أنساها أنساها
يا قلبي أنساها
فارق دروب الشوق
واتجاوز الآهة
* * *
عشت الليالي سهاد
مستني همسة ريد
راجي الحبيبة تعود
تعزف هواها نشيد
لكن وكِت طلَّـت
كانت هي ما ياها
يا قلبي أنساها
فارق دروب الشوق
واتجاوز الآهة
* * *
مهما الحزن طوَّل
بوصل مداهو الحد
بكرة الجروح تبرا
وباب الألم ينسد
والفرحة مهما تغيب
حتمــاً حتلقاها
يا قلبي أنساها
فارق دروب الشوق
واتجاوز الآهة
17/3/2000

*هذه القصيدة تغنى بها المطرب الطيّب مدثر من ألحان صلاح إدريس.

الشوك والفراش

ملعون أبو الزمن الكعب
ملعون أبو الشوف الطشاش
بِـنده عليك حجر الرصيف
يا قسمة محروقة حشا
ويا ضو مجرتق بالغباش
شفناها في الخلا في البراح
منتوفة جنحات الغناوي
وجـرَّح الشوك الفراش
يحرم عليك ريدنا المتاح
ويتقسَّـم المدسوس حِـتَـت
ويتلاشى لو في صمتو عاش

* * *
ملعون أبو الزمن اللئيم
ملعون أبو العشم الكِـضِـب
تريانة واطاة النشاف
مسقية بالخوف والغُلُـب
وردتنا من زمن الرحيل
حفيانة في رمض الهجير
ملهوفة بتنادي الدعاش
في حلمة...لو العين تنوم
يلقاها ماد ايدينو باش
يا دخري أيام هسة جَـن
أوقاتا صاحن وجوجن
عاملات دميعاتن فُراش
يا مطيرة خليهو العجن
حتم السحايب يوم يجن
وينفَـشَّ في الشوك الفَرَاش
ونغني في الليل الكَجَـــن
ملعون أبو البكا والشجن
ملعون أبو الشوف الطشاش
اضرب الهم بالفرح
ابتســم،ودِّع همـــومك واضرب الهــــم بالـفــرح
واطرد الخوف المخيِّــم وابـعـد الحـزن الــسـرح
وازرع الأمــل المخــدِّر جــايـي بعد الليل صُــبُح



الدنيا ضحكة وابتسامـة وكـلمـة حلوة وانـبساط
همسة من ثغر الحبيِّـب تفرش السنـدس بسـاط
يضوِي كونك حِس نداها وتخـلق أجـمل ارتـبـاط
تروي أرضك مـن سمـاها وتجـلـب الخـير النـزح
ابـتـسـم،ودِّع همـومــك واضـرب الـهـم بالـفرح




أحـلى ما فـينـا المـحَنَّـة ولـهـفة الشوق والتلاقي
جذوة الحـب المـأصَّـــل من زمان في قلوبنا بـاقي
ضاوي للظلمات صباحو ولي زهور أحـلامـنا ساقي
بـي وتـر عشقو المدوزن لـحنـو غنَّــالنا وصــدح
ابـتـسم،ودِّع هـمــومـك واضـرب الـهـم بالـفرح


14/12/1998

وجع السفر


نَفَسِك مجرتق بالدعاش
حضنك وطن...
عضَّ ونَتَش جرح البيوت
مشدودة في شد البطن
شايلك نهايات انتهن
فوق كتفي مرصوصة الصفوف
لولاية ما شالت طفل
غنّاية ما ساقت نغم
يا كلمة ما اتقالت أبد
يا نسمة ما ضاقت رفيف
مربوطة بي حبلاً مسد
سطَّاعة في ليلة دخول
بسراعة ضاريتي القمر
نورك غَـمر...
حلمك عَـمَر...
لاقتني نخلتنا الزمان
تبكي وتنوح
حبل السعف...
مشنوق مشتت في الرصيف
لا خطوة لا درب الخريف
لا زول يكابد
وجعة الفرحة السفر
أنا مالي مال وجع السفر
حظك مكمَّـل في الغُـنا
ومنعول أبوك حنبل مطر
كلمات مسمَّـرة في الحلوق
تركب قَطَــر...
تنزل قِـطَر...
وجَّـاعة زي فاضي الكلام
أنا مالي مال فاضي الكلام
دربك ممهد بالحفر
بقراكي من أول سطر
ببداكي من آخر سطر
فوق صدري بحتفلوا الكبار
بي حرفي تنتحر الحروف
نحيا ونشوف
بكرة الظروف
ما ترضى غير تبقى الظروف


26/12/1996

لون المغرب

شال من لونك لون المغرب
رشّ الطل الباهي سقانا
قشَّ الحرف الباكي دموعو
وكتين شافك جاية معانا
الأفراح من إيدنا اتسربت
إلا معاك دايماً تلقانا
فوق إيدينك ركّت غنوة
كان ياريت لو شلتي غنانا

* * *

شال من لونك لون المغرب
عدّى وفات من ليلنا عذابو
طرد الريح الجافية نسيمك
وعاد للنبع الصافي عبابو
طلَّ النور المنِّـك جانا
وفتح الغيم فرحان أبوابو
غسل الأسف الكان مالينا
مطراً صبّ هداك يادابو

* * *
شال من لونك لون المغرب
بحر الليل من شعرك سال
غابت نجمة وطلت قمرة
ورسمت نورا غنا وموال
كتبت ليك الوردة قصيدة
عشان الريدة حلم أجيال
ولون المغرب شال من لونك
مشوار بهجة ورحلة فال

4 /11/1997
عشان عينيك


بخلق منك ألف قصيدة
وغنوة بتاخد منك سمرة
عشان عينيك
يا صخب الشوق
الشحتف روح القمرة
عشان الريد الطرّز عمري
مدامع وغصة وعبرة
عشان الموج الكاتم سري
يقول القصة بأجمل نبرة

* * *


بخلق منك غابة بتضحك
ولوحة بتاخد لون رسّاما
سنين ممدودة حروفي بتعشق
لون الوردة وهمس كلاما
سنين ممدودة
جروح الغيمة بتنزف حكمة
وترسم جوة الغيب احلاما
منك بخلق الف قصيدة
وسيمة طلعة وفارعة قامة
عشان عينيك
يا ضحكة بريئة
رسالة فرحة تشيلا حمامة

16/5/1996


ضُــحَـى

ألف أهلاً يا ضحى
يا ناعس الزهر الصحى
يا دوحة في بستان مخدر
وارفة زي ضل الضحى



ألف أهلاً يا ضحى
حققت بي جيتك حلم
والحزن من قلبي اتمحى
راجيكي من زمناً طويل
يابشرى حلوة ومفرحة
إحساسي مرسوم في غناي
يكشف عواطفي ويفضحـا
يا دوحة في بستان مخدر
وارفة زي ضل الضحى



أنا تهت من قبال وصولك
كنت زي ساقية جحا
مستني في ليلي الكئيب
الداس ورودي وجرّحا
لكن حضورك يا ضحى
عطّر حياتي وأفرحا
يا دوحة في بستان مخدر
وارفة زي ضل الضحى

6/12/1998


حـزن السنين


جرحك سكب حزن السنين
ليلك كتب
في مهرجان طعم الأنين
من بين فراديس الغرام
لون انتحر
فاتِـن محطاتو الطرب
مشرورة في الصوت الجروح
نزَّافة بي وجعاً غَلَب
عزة مداراتك تبوح
ضُـل الشمس ضَـلّ الطريق
شقَّ البحر فرهد حريق
ما بين مسافات النـزوح
عنقود عنب
حلمك سلب حلمو البريق
يا صولجان يا برتكان
يا كان وكان
أنا مهما طال بَيْ الزمن
خطوة شتات
برجاكي بي وعدي الزمان
وأنا مهما فات حدِّي النزيف
تلقيني في نفس المكان

17/12/1996


أنـسـاني

أنساني يا نسّــاي
واختار حبيبة سواي
يا سالك الدربين
عارفاك بتلعب ساي

* * *
حبك شقا وتزييف
وحصادي منو نزيف
أهديتك أحلى ربيع
منك لقيت الصيف

* * *
وعدك وهم خدَّاع
دربك صعب وجَّـاع
ضيَّعت مني عمر
ياحليلو عمري الضاع

* * *

عمَّـقت فيني جروح
وهدمت ليَّ صروح
يا قاسي يا ظالم
من الله وين بتروح

* * *

أنساني يا نسّاي
أنساني يللا... كفاي
يا سالك الدربين
عارفاك بتلعب ساي
انـفـلات

يا مارقة من بين السحاب
ماسكة القمر في ضل رموشك
والشمش جواك تضوي
هاك عصافيرك...بطيرن
هاك مساديرك...بغيرن
رقرقي وفُضِّي المقفل
خلِّي أيامك تسوِّي
لـملمي الغيم المغفل
أدِّي لو شفقان تَرَوِّي
صادّة مالك من جنونك
سادّة بيبانك صباح
سارحة جوّاك الغناوي
وصَامّة خشم الحقو راح
داخلة في الحلم المكرزِن
شاردة من درب المباح

* * *

يا مارقة من باب الجرح
جرحك ببتّـق
لو صهيلك مرة غطاهو النباح
يا سارقة من القيف خدارك
ضي نهارك بنتحر
لو مرة ضو الكلمة باح
يا حارقة دربك بي رحيلك
خلي دربك في رحيلو
أسألي البحر المطهَّم
شوفي كيف راجي البقيلو
شاوري ضلك
شدي حيلك
سافري لو شديتي حيلو
بكرة بنقال المكتم
بكرة بنطلقن خيولو

20مايو 1997


حزن المدائن


كيف يكون قلب المدائن منشرح
والفرحة فاتت سافرت
خلّت شوارعنا البكت
مصلوبة في الزمن الكعب
مليانة بالهم والتعب
مشتاقة للبسمة التكون بلسم
يداوي الكم جرح

* * *

بس كيف يكون قلب المدائن منشرح
والوجعة في جوف المسادير انطوت
كيفن نقول الليل فِرِح
والنجمة نامت فوق رموش الغنوة
والكلمة الزمان
كانت تلوّن مهرجان الريدة
والعشق السمح

* * *

كيف يكون قلب المدائن منشرح
والدمعة تنزل من عيون القمرة
زي أنة حزن
مرسومة في وش الصباح
نخلة وكتير عصفورا ناح
والبسمة راحت من زمن
منفية في الدرب الصعب
عدّت مع الفرح الهرب
والشوق ينادي عليها يوماتي ويِلِـح
كيف يكون قلب المدائن منشرح
4/6/1996

درب الأمل



كم تمنيت أهجر الهم
لي مداين فرحة وأجمل إبتسامة
كم تغنيت للعصافير والأزاهر
بي حروف صارت علامة
وارتجيت زمناً منوّر
رحلة بين جنحين غمامة
ماشي في دربي المخدّر
بي أمل بهجة وسلامة

* * *


بكرة ترتحل المخاوف
وينجلي الليل الأسيف
بكرة تنهزم المواقف
والمواعيد العنيدة...
ورعشة الزمن المخيف
تمسح الدمعة الغناوي
وينشر الخضرة الخريف
بكرة تبتسم العيون
الكايسة للضل الوريف
وينزوي الحزن المرقرق
في المسامات... والنزيف

28/10/1997

أصـــالـة


لما يمطر فيض زلالك
ويطوي ليلاً داجي حالِك
نلقى فيك...
كل المواعيد تتلغي
كل المسارات ترتقي
بيك ينشرح قلب الحروف
تتناجى بالريد النقي

* * *

كانت وراك
كل المساحات مستباحة
والملايين البتهتف
ماخدة من حبك فصاحة
ارتدت شعلة وميضك
واكتست نورك سماحة
يا العشانك
صحوة الشوق تبتسم
ويحتوي الفرح النهار
تحضن الزهرة الفراشة
ويرسم الموج انبهار
ويرجع الهمس المتيـَّم
يكتب النغم السعيد
في براحاتك عشانك
غابة تخضَـر من جديد
والبحر في لهفة واقف
نبرتك في صوتو شالا
يلقى في عيونك مرافي
وفي صَدَف صُدَفك بسالة
إنت يا صورة وطن
ألوانا من صدق الأصالة
لما يمطر فيض زلالك
لما يمتد فـَيْ ظلالك
نلقى فيك...
كل المواعيد تتلغي
كل المسارات ترتقي
كل الصباحات تلتقي
مبهورة بي حسن الغزالة

14/4/1999

شـــــكـوك

أشك إنك تَـمِـسك الموجة
من ايدا
وتهد حلماً بناهو الليل
أشك إنو البحر يضحك
ويهز كتفينو في دهشة
ويراجع خط مشيهو قبيل
لقيت الغنوة ضامَّـة الغيمة
في عز الحريق الكان
وكان الشوق
بمشط في ضفاير الريد
وكان وش القمر خجلان
تشيلني الكلمة تفرح بَيْ
وأصالح خاطرا الشقيان

* * *

سكتَّ على الشقا
الماليني بالوسواس
وكم نشفت مواعيدي
الملوَّنة بي هموم الناس
مشيت أرجف مشِي الخايف
خُـطاهو تسكِّــت الأجراس
ولما بكيت صرخ قلمي
وحِزِن بالصِّح
وبلت دمعتو الإحساس


مــلــهـمـة

يا ملهمة
يا دفقة الشجن المعربد
ونجمة بتضوِّي السما
غنيتو وعدك لَيْ قصيد
وزرعتو في الأعماق نما
وحضنت ريدك في الضلوع
خليتو بي قلبي احتمى
لو غابت أفراحي ومشيت
أو مرة فيض موجك همــا
أو تاهت الخطوات معاك
والسكة صارت مؤلمة
تلقيني دايماً معترف
بي إنك انت الملهمة

* * *

يا ملهمة شعري المدفّق
ضامِّـي في ساحاتو غيمك
تنحسر كل المواجع
لمــا شلالات عطورك
تستبيح لحني ونسيمك
تبقِي لَيْ جنة نعيمي
وأبقى ليكي ظلال نعيمك

* * *

بيني ما بينك عيونك
سطوة الليل والتحدِّي
ارتحال كل المخاوف
ووقفة الشوق للتصدِّي
لما أقول قولي وأساهر
أبقِـي عاد يا حلوة ردِّي
جيبي لي حلمك وميضو
ورجِّــعي الضي لي نجومك
لما شلالات عطورك
تستبيح لحني ونسيمك
تبقِــي لَيْ جنة نعيمي
وأبقى ليكي ظلال نعيمك


25/9/1999

مواني الوجعة

ولا وعداً صَدَر منك
ولاحنثـاً بدر مني
مواني هوايا لاقنك
مواني الوجعة لاقني
حدودي الموت على دربك
معايا غُنايا حانَـنِّـي
فهل كان الموات منية
وليك خطواتي جابني !!
معذب بالرُّعاش ارجاك
مسافر شوقي شايلني
مودَّر بالحزن والهم
نجوم أفراحي سابَني
على عشم الهنا المفقود
عيونك والله شاقني
عيونك والله ساقني
علي بلداً بعرفو الغيم
اريت غيماتو لو جَنّي
على بلداً سماهو غناي
كتير غنواتو شدّني
زرعت حروفي ليك غابات
حروفك انت ردني
وما لمتك على ردك
ولا لمتك
براي خطواتي وَدَّني
براي أديت مداينك ريد
ولا فى مرة أدَّني
وما أوصدت باب عينيك
أنا الأبوابا صدّني
كتير عينيكِ شاقني
وساقَنّي
على بلداً نسيمو دعاش
أريت نسماتو لو جَنّي


1/12/2000

الليل والرحيل

برحل منك ليك مسدارك
وجعاً عدّى وفارق دربك
يوم ما فارق حزنك دارك
كلمة بتنشر فرحة وعدك
تبدا تخفـف حرقة نارك
كان الكوكب تاه في مدارو
محل ما يفقد عشمو بيصبر
يكون مشتاق...
في خاطرو مدارك
سكة تودي...
وسكة تودّر
سكة تودع زولآً دارك
شوفي النيل كيفن بتهادى
عشان ما حقق حلمو وزارك
كنا نسوِّي الضحكة سحابة
وكنا بنفرش ليلك غابة
محل ما تفوت الغيمة تغني
ووين ما نكون اللقيا بتابا




خبارك إنت بتزرعي فينا
شتول أحزان من تاني...
خبارك
نحن زمان ما كنا بنسرق
من ضل دارك
مقطع نمة...
ولحظات جمة...
نلخبط فيها شتاك بي نارك
وليكي نغني...
غناك يدينا الفرح المرح
القمر السابح وسط أقمارك
لسة بنحلم تاني تجينا
عشان ما تفارق نيلنا دموعو
وشان ما يشرب فيضو خدارك

30/11/1996
لــسة بحــلـم

لسة بحلم
بالمواعيد النقية
بالهتافات الرضية
بالصباحات الندية
لسة بحلم...
بي قلب صافي وبشاور
ضحكة في الزمن المشاتر
طفلة بتغني وتزغرد
عشقها الصبح المسافر
هسة بحلم
بي شمس صاحية وحيية
ترتسم تغسل مآسي
وتمسح الدمعة الرويَّة
تبتسم تروي الأصايل
ويفرح الليل بي مجيَّـا
وبرضو بحلم...
بي عيون لاقن نهارِن
لاقن الأمل المخدِّر
فرهد الريد في ديارِن
والنجوم عرفن مدارِن
والقمر بي نورو جارِن
والشمس في انتظارِن
والصباح الزاهي أشرق
ودَّع الأحزان وزارِن
ولسة بحلم...

9/9/2002

أنـا والمــطر

نجيك أنا والمطر يوماتي
متماسكين ومتقالدين
وراسمين في حنايا الموج
حكاية شوق
ورحلة بسمة بكاية
تجيك الموية من تال الصدى القبلي
وتكون محبوسة في الأغصان
تزيد الشوق
يزيد النيل علا وهيجان
معاي القمرة نتمشى
وندوس خاطراً بدوس الضو
أسالمك يا شعاع كلمات
دوام منسية
في الركن الزمان منسي
وأكالمك يا نَـفَس مجروح
وأقول للدنيا ما تنسي
خلاص راحت فواصل غربة
والغنوات تسابق دمعة بتعربد
على الخد النشف محروق
على الباب الزمان مطروق
نجيك أنا والمطر يوماتي
متواصين
ننادي الغيمة للسهلة
ونواصل سكة مقفولة
وبنتحدّى
نجيك شايلين صباح أخضر
محزم في الخلاوي سِبَح
نسوقك دنيا لا مفصولة
لا محدودة لا مفهومة حلماتا
ولما تجينا من باب السما النجمات
مداينك تبقى مقفولة
وحلاوة الدهشة معقولة
معاك ما كان زمان بضحك
صباح الخير
يزغرد ما بشيل هم الغنا السافر
ولا الكلمات ومدلولا
نجيك أنا والمطر يوماتي
متبارين
وشايلين الوفا المافي
بنسكب من ندى الزهرات
فرايحية
نجيك أنا والمطر يوماتي متراضين
ومتصافين
نحسك انت كلمة سر
نحفك بالخدار مرة
ونهزك بالغزل مرات
حلاتك سمرة نيلية
وحلاتك بت مزارعية
معاك نركب سرج واحد
حلاتك انت قمرية
وحلاتك نسمة صبحية
منو القبالك انت رسم
رشاش دمعاتو زغرودة
منو القبالك انت حكم
مدار الكوكب المطرود
يكوس لي هالة مطرودة
حلاتك نجمة وردية
عيونك عزة بالشرف
القديم الغالي مسقية
حلاتك قعدة عصرية
حلاتك سمرة نيلية
وحلاتك يا حلاتك

17/9/1996
ارتـشـاف
يا الشلتَ من وعدك قصيدة
وشلتي مني الإرتوا
داخت مع فيضك مداين
وارتشف صمتي الكتابة
واكتشف عيد انزوى
غرقانة في عينيك بحور
حاضنة الإطار والمحتوى
بالغتي وكتين اشتهيتك
واستويت بين دهشة الريح والنوى
بالغتي وكتين سقتي مني الإحتجاج
هزيتي معنى سفر غناك
بي طيبة أجبرتي السفر
يعطش رَوَا
علم اليقين إنو الخيام
منصوبة للحلم الأصيل والمستحيل
والإنحدار والإستوا
من حيث ما نشوة مشاعرك تعتريني
وأنفلت من ذوق مراكبية وحريق
ما ضلّ قلبي وما غوى
تلقيني بين بين منستر
وسط الشموس الباكية والليل انطوى
تلقيني عين عين منبسط
في كل واحة حب وريفة
وكل طريق
نمشيهو للعشاق سوا
لكني من بعد المسرة
ورحلة الشوق المعاك
قلبي المسيكين انكوى
أصبح وراك مكسور جناح
فكيتي لَيْ عكس الهوا
16/2/1999
ســــــؤال

سرق وعدك مواعيدي
وسلب صمتك ضجيجي الطال
مشيت في الشارع الموهوم
بعودة طيفك الرحال
نسفت ظنون تساورني
وجلبت من العناد صدِّك
وما لاقت ردودي سؤال
صحيح كان النخل مرتاح
صحيح القمري غنّى وباح
ودشَّـن ريدو بالقوقاي
وخـتَّ وشال
رجيتك منكفي وسأ آل
مشيت لاقيت خريف وعدك
مطرَّز بالحريق والخوف
وطرف الخيط غيابك
بي حضورو الصِّح
وهمسو تعال
سرق وعدك فرح عيدي
وجرح ريدي
ورقص في الصحرا والأدغال
هاك الغنوة يا قمرية
ما تخلِّي النخيل يزعل
وما تبكِّي البحر
لو كان سحابك شال
أنا اليا غاب مصير وعدك
كتير أتوارى مستور حال
بتوه منك إليك وأحلم
ترسِّلي لي فِرِد مرسال
وما بين اليقين والشك
يباغتني اليقين بالفال
وما بين الحريق والغيم
تجيني الغيمة سايقة ظلال
يعود وعدك بلا ميعاد
ويقدِّم لي إجابتي سؤال


2/2/1999
ربك لطف
لاقاني بيك
في واحدة من أحلى الصدف
رجعني للفرح الزمان
أصلو الفرح طعمو اختلف



ومشيت بعيد
لامن لقيت سري انكشف
وغرامي ليك
الكنت داسيهو انعرف
احترت وين ألقاك... وكيف
في الريدة اتحاشى الكلف
إلا بس ربك لطف
لاقاني بيك
في واحدة من أحلى الصدف



قبال تجيبني الصدفة ليك
أنا كنت ماليني الأسف
وكتين حرق جوفي النويح
وكتين قمر ريدي انكسف
وأنا كنت في حيرة وظنون
ومعاها كم جرحاً نزف
إلا بس ربك لطف
لاقاني بيك
في واحدة من أحلى الصدف
رجعني للفرح الزمان
أصلو الفرح طعمو اختلف


24/9/1999



توركواز الموج والعمامة الغضب

زين أحلامك أنا
ورد الضفاف المترعات
شذى ، وألوان الخريف
أطرق الأسحار قصداً
فترتدّ القيود إلى يديّ
إني رسمت العشق أياماً
بلون الدمع والليل المخيف
سكنت جوانح الفأل المباغت
صرخة الفجر الذي
غمت بشائر لحنه
بالعتمة الدكناء والهمس المؤرشف
والدخان
تأرجح الصوت الذي تاهت خواطره
فنادى عبر أشرعة المسارات الزمان
الليل نام مهلوساً
فاضت جوانبه وصار الحلم
داخله زوايا من نداء الإنفعال


زين أحلامك أنا
وقطر الشهد والقول المباح
أنا الذي عانقت صبحاً
أشتهي أضواءه
غابت ملامحه وذابت
في غموض البوح والكفر الصريح
تدافعت زمر الحروف
وجدد الألحان صمت القهر
والوجع الذي سئم الفواصل
والمفاصل وانهيارات السقوف
زين أحلامك انا
والعطر والأضواء والحرف العفيف
الموج يحترف الغناء
تثور بيضاء العمامة فوقه
ويمور داخله الغضب
فيلوّن الشمس النشيج
خيوط صبحك يا مساء تضاحكت
وتدافعت صوب الأريج

زين أحلامك أنا
والكوخ والقصر المنيف
إني فضضت بكارة الشعر البتول
وغلمتي تشتاق أثداء السطور الناهدات
أفكّ من جيل الطلاسم
توركواز الموج والنخل العتيق
زين أحلامك أنا
والبحر يأخذني أسيراً
عندما يتسول الزبد التراخي
والمزامير السكينة والهدوء
أتت الحقيقة مرة
تمشي الهوينى وحدها
راودتها عن نفسها فاستعصمت
ومضيت في دربي وحيداً باكياً
زين أحلامك أنا
والدوح والأزهار والظل الوريف


الأربعاء26/4/1995

انفلات

يا مارقة من بين السحاب
ماسكة القمر في ضل رموشك
والشمش جواك تضوي
هاك عصافيرك...بطيرن
هاك مساديرك...بغيرن
رقرقي وفضي المقفل
خلي أيامك تسوي
لملمي الغيم المغفل
أدي لو شفقان تروّي
صادّة مالك من جنونك
سادّة بيبانك صباح
سارحة جوّك الغناوي
وصامّة خشم الحقو راح
داخلة في الحلم المكرزن
شاردة من درب المباح
* * *
يا مارقة من باب الجرح
جرحك ببتق
لو صهيلك مرة غطاهو النباح
يا سارقة من القيف خدارك
ضي نهارك بنتحر
لو مرة ضو الكلمة باح
يا حارقة دربك بي رحيلك
خلي دربك في رحيلو
أسألي البحر المطهم
شوفي كيف راجي البقيلو
شاوري ضلك
شدي حيلك
سافري لو شديتي حيلو
بكرة بنقال المكتم
بكرة بنطلقن خيولو